2025 senesi oraq ayınıñ 17-ne qadar işğal etilgen Qırımda Rusiye quvetçileri RF ordusınıñ "diskreditatsiyası" maddesine istinaden eñ azından 1472 memuriy dava açtı. Bu aqta Ukrayina prezidentiniñ Qırım Muhtar Cumhuriyetindeki Temsilciliginde haber ettiler.
Yarım yıl içinde Qırımda Rusiye kontrolindeki mahkemeler eñ azından 1340 kere ceza qararını çıqardı, çoqusı allarda — para cezası. Ermeni Bazardaki vaziyetni eñ repressiv olaraq adlanılur, mında 2025 senesiniñ tek birinci yarısında 164 dava açıldı.
Aq qorçalayıcılarnıñ malümatına köre, Qırımda siyasiy sebeplerden 221 insan apiste yata. Olarnıñ arasında 133 qırımtatar, olarnı delilsiz "terrorizm", "ekstremizm" ya da "devlet hainligi"de qabaatlaylar. Bu taqipler, er angi qarşılıq kösterüvlerini yoq etmek, tamır halqını sürgün etmek ve vatandaş aqlarını bastırmaq içün yapılğan kampaniyanıñ bir qısmıdır, dep qayd eteler temsilcilikte.
Yaqalanğanlar arasında:
- 24 yaşındaki Hatice Buyukçan, Rusiye ordusınıñ zabitine qarşı terakt azırlağanında qabaatlana. Quralaynıñ başından berli qıznıñ bulunğan yeri belli degil edi.
- Adı bildirilmegen 40 yaşındaki Aqmescit sakini. Erkekni, Rusiye telükesizlik hadimleri "ekstremizm" olaraq tanığan içtimaiy ağdaki izaatları içün apiste tutalar.
- Qarasuvbazar rayonında ilâchanede çalışqan Niyara Ersmambetova, bu sene quralayda "devlet hainliginde" qabaatlanıp esirlikke tüşti.
Temsilcilikniñ aytqanına köre, taqiplerge baqmadan, yarımada sakinleri işğalge qarşı tirenmege devam ete.
"Er bir beyanname, er bir yazı, er bir berilgen malümat — cesaret areketidir. Bu er künlük hatırlatmadır: Qırım yeñilmegen. Qırım tirene. Qırım Ukrainadır", — dep qayd ettiler.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler.
