Jurnalist ve siyasiy tefsirci, Qırım.Aqiqatnıñ közeticisi Vitaliy Portnikov "Serbest Qırımğa mektüpler" teşebbüsi çerçivesinde "Qırım musulmanları davası"nıñ figurantı Vladlen Abdülkadırovnıñ mektübini oqudı. Bu aqta Ukrayina prezidentiniñ Qırım Muhtar Cumhuriyetindeki temsilciligi haber ete.
"Şimdi qırımtatar faali Rusiyeniñ Arhangelsk vilâyetindeki İksa qasabasınıñ 21-nci tüzetüv cezahanesinde buluna. Vladlenniñ sağlıq vaziyeti tez fenalaşa: siyasiy mabüsniñ aş keyfiyetiniñ fenalaşqanı sebebinden, onıñ qara ciğer ve büyrek problemleri bar, körügvi fenalaştı", — dep aytıla haberde.
Vladlen Abdülkadırovnı Rusiye akimiyeti "terroristik faaliyet" içün 12 yıl sert rejimli koloniyada qalmasına üküm etti.
"Arhangelsk vilâyetinden yazam. 2024 senesiniñ yazında bu yerge Lipetsk vilâyetinden etildim. Öz qıymetli vaqıtıñıznı sarf etip adaletsiz mahküm etilgen ve apis cezasını çekkenlerge qol tutqanıñız içün minnetdarım", — dep yaza qırımlı.
2023 senesi çeçek ayında Ukrayinada "Serbest Qırımğa mektüpler" aktsiyası başlandı. Onıñ maqsadı Kremlniñ ukrayinalı esirleri aqqında hatırlatmaq, em de olarğa destek köstermek ve bildirmek. Bundan da ğayrı, mektüpler Rusiye apishaneleriniñ memuriyetlerine er bir Ukrayina vatandaşı müim olğanını ve cemiyet olarnıñ apishanede tutuluv şaraitlerini nezaret etkenini köstere.
