Rusiye Federatsiyasında 18 yıl azatlıqtan marum etilgen Aluştalı imam Lenur Halilov Arhangelsk cezahanesinde buluna. Bu aqta "Qırım birdemligi"ne onıñ qadını Umida Halilova ikâye etti.
Qayd etilgenine köre, erkekni Vladimir merkeziy apishanesinden 1-inci taqiqat izolâtorına avuştırğanlar. O, anda 2022 senesi orta küz ayında keldi ve anda üküm boyunca tayinlengen eki yıllıq cezasını keçirdi.
Umida Halilovanıñ aytqanına köre, apishanege avuştırılğan soñ, aqayını apishaneniñ hastahanesine yerleştirdiler. Lenur oraq ayınıñ ortasına qadar anda qaldı. Qırımlınıñ diagnozı ve hastalığı şimdilik belli degil.
Lenur Halilov "Aluşta" mustaqil musulman cemiyetiniñ sabıq yolbaşçısı
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen "Hizb ut-Tahrir" islâm siyasiy firqasınen alâqaları bar dep qabaatladı.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
