Rusiye ordusı oraq ayınıñ 21-ne keçken gecesi Ukrayinağa 426 uçucısız uçaq, beş X-47 M2 "Kinjal" aeroballistik raketası, 14 X-101 qanatlı raketa, dört "Kalibr" ve bir "İskander-K" qanatlı raketanen ücüm etti, dep bildire Ukrayina Arbiy ava quvetleriniñ komandanlığı.
Ukrayina arbiyleriniñ saat 9.30 bergen malümatına köre, 224 ava ücüm vastası urulıp tüşürilgen ya da yoq etilgen. Üç yerde 23 pilotsız uçqan cihaz tüşken qayd etildi, 12 yerde dron urulğanı qayd etildi, denile beyanatta.
Kıyiv şeer memuriyetiniñ yolbaşçısı Timur Tkaçenko bildirdi ki, Darnıtsâ rayonında ücüm neticesinde çoq qatlı evniñ ve mesken olmağan binanıñ damında, em de supermarkette yanğın çıqqan. Şevçenko rayonında mesken ev ve çoq qatlı evniñ balkonları yandı, Dnipro rayonında — ticaret sıraları, bala bağçası territoriyasına uçucısız uçaqnıñ parçaları tüşken, Soloma rayonında yanğınlar mesken ev ve anbarlarda yüz bergen.
Bundan ğayrı, Kıyivde "Lukyanovka" metro stantsiyasınıñ kirişi zarar kördi. Yerli akimiyetniñ malümatına köre, stantsiya kiriş ve çıqış içün qapalı. Poyezdler toqtamayıp keçe. Diger metro stantsiyaları adiy rejimde çalışa.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturasına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
