Oraq ayınıñ 22-ne keçken gecesi Ukrayinağa 42 Rusiye uçucısız uçağı ücüm etti, dep bildire Ukrayina Arbiy-deñiz quvetleriniñ ava quvetleri.
"Üç yerge doquz uçaq urğanı ve üç yerde urulıp tüşürilgenler qayd etildi", — denile beyanatta.
Donetsk vilâyetiniñ Kramatorsk şeerinde idare etilgen avia bombalarınıñ darbesi neticesinde çoq qatlı ev zarar kördi. Şeer memuriyetiniñ yolbaşçısı Oleksandr Ğonçarenkonıñ aytqanına köre, 10 yaşında bala elâk oldı, daa beş insan yaralandı.
Salı künü saba Slavânskta ateş neticesinde eñ azdan dört insan zarar kördi. Şeer başı Vadim Lâhnıñ aytqanına köre, çoq zarar kördi, hususan mesken sektorında.
Sumıda ava ücümi neticesinde beş çoq daireli ev, 18 avtomobil ve ticaret merkezi zarar kördi. Üç adam yaralandı, şu cümleden bir bala. Umumen tibbiy yardım içün 12 insan muracaat etti, dep bildirdi Ukrayina Fevqulâde vaziyetler boyunca devlet hızmeti.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye yolbaşçılığı, Rusiye ordusı Ukrayinanıñ şeer ve köyleriniñ grajdan infrastrukturasına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıy ve olarnıñ maqsatlı olğanını qayd ete.
