2025 senesiniñ birinci yarısında Rusiye quvetçileri eñ azından 12 kere mahküm etilgen qırımlılarnı ceza izolâtorlarına, mahsus bloklarğa ve bir kişilik kameralarğa yerleştirdi. Bunı Qırımtatar resurs merkezi bildire.
Bu repressiyalarğa oğrağanlar: Oleg Fedorov, Remzi Bekirov, Seyran Saliyev, Edem Smailov, Mecit Abdurahmanov, Teymur Abdullayev, Ruslan Abdurahmanov, Seyran Saliyev, Riza İzetov, Server Mustafayev, Ruslan Mesutov ve Oleksiy Kıselev.
"Aqiqatta Qırım siyasiy mabüslerini SİZO-da izolâtsiya etüv ameliyatı endi sistematik oldı ve şaşqınlıq doğurmay. Bu tendentsiya 2020 senesinden berli körüne. Ceza izolâtorlarına yerleştirüv — siyasiy mabüslerge yapılğan basqınıñ eñ sert usullarından biridir", — dep aytıla haberde.
Bundan evel QRM, Rusiye akimiyeti siyasiy sebeplerden taqip etilgen 260 qırımlını apishanelerde tuta, dep bildirgen edi. Olardan 153 qırımtatardır.
Daa evel "KrımSOS" aq aqorçalayıcı teşkilâtı, 2024 senesi Qırımda eñ azından 56 qırımlı Rusiye akimiyeti tarafından taqip etilgenini bildirgen edi. Bundan ğayrı, Rusiye quvetçileri yarımadada 45 qanunsız tintüv keçirdi.
