"Qırım musulmanları dava"sınıñ dörtünci Canköy gruppasınıñ 34 yaşındaki figurantı Abibulla Smedlâyev Aqmescitniñ 2-nci SİZO-sında ağırlaşqan köz ve körme problemleri aqqında tarif etti. Bunı "Qırım birdemligine" qırımlınıñ apayı Liniza Smedlâyeva bildirdi.
Onıñ aytqanına köre, apiske alınmazdan evel aqayınıñ körüv ile bağlı problemleri bar edi. O vaqıt ekim oña sağ közünde miopik astigmatizm ve sol közünde zayıf derecede miopiya diagnozını qoydı.
Smedlâyevge ekim retsept yazıp, közlük taqmaqnı tevsiye etti, lâkin bu sene kiçik aynıñ 5-nde tintüv vaqtında közlükler parlandı. Tutulğanından soñ onı közlüksiz alıp kettiler, ve o vaqıttan berli SİZO-da közlüksiz qala.
Smedlâyevanıñ aytqanına köre, şimdi aqayınıñ közleri pek ağra. Qırımtatarnıñ tamçı berme ve bu aqta yazılğan talaplarına 2-nci SİZO hadimleri "Mümkün degil" dep cevap berdi. Qadınnıñ qayd etkenine köre, qocasınıñ paket alında tamçı almasına da "bizde var, ona berecekmiz" bahanesinen izin bermeyler.
Qırımtatarğa ilâc öyle de berilmedi.
Kiçik aynıñ 5-nde saba, Qırımda Rusiye quvetçileri beş qırımtatarnı tutqanı aqqında belli oldı. Qırımnıñ Canköy ve İslâm Terek rayonlarında saba saat 4-te FSB hadimleri Emir Kürtnezirov, Abibulla Smetlâyev, Rustem Mustafayev, Mirzaali Tacibayev ve Bahtiyar Ablayevniñ evlerine tintüvlernen keldi.
Tintüvlerden soñ qırımlılarnı tahqiqat tedbirleri keçirilmesi içün Aqmescitteki FSB idaresine alıp kettiler. Er kesni "Hizb ut-Tahrir" islâm siyasiy firqasınıñ faaliyetinde iştirak etüvde qabaatlaylar.
