Keriçli Sergey Kozlov ve Yevgeniya Samoylova Rusiye quvetçileri tarafından "devlet hainligi" ve "Qırımda terakt azırlağanında" qabaatlana. Olarnı 2024 senesi çeçek ayında tutıp aldılar, ve alâ daa bulunğan yerleri aqqında malümat berilmey. Şimdilik belli olğanı kibi, olarnıñ davası boyunca ilk mahkeme oturışı arman ayınıñ 4-ne Rostov-na-Donu şeerindeki Cenübiy okrugınıñ arbiy mahkemesinde keçirilecek, dep haber ete TASS.
Rusiye akimiyeti olarnı "Z ve V" timsalleri ile maşnanı ateşke berüvde, em de "Qırımda demiryollarını patlatmağa azırlanuvda ve Aqyarda Rusiye Silâlı quvetleriniñ arbiy hızmetçisini öldürüvde" qabaatlay. Rusiye quvetçileriniñ versiyasına köre, Sergey Kozlov ve Yevgeniya Samoylova Ukrayina Mudafaa nazirliginiñ Baş istihbarat idaresine çalışıa ediler.
"Aqyar prokuraturasınıñ malümatına köre, Keriç sakini Sergey Kozlov 2023 senesi ilk küz ayında Ukrayina istihbaratınıñ hadimleri ile bağ qurdı ve ömür arqadaşı Yevgeniya Samoylovanı çetel mahsus hızmetinen işbirlikke celp etti. Kuratornıñ avalesine köre, figurant Molotov kokteylini ve öz başına yapılğan patlayıcı aletlerni yapmaqnı ögrengen eken. 2023 senesi orta küz ayında o, Keriçte Z ve V logotipleri ile avtomobilni yaqıp, 860 biñ rubleden ziyade zarar ketirgen", — dep yaza TASS.
TASS-nıñ malümatına köre, Sergey Kozlovğa qarşı "terakt, devlet hainligi, terakt azırlavı" maddelerine istinaden dava açılğan. Yevgeniya Samoylova "devlet hainliginde, terakt azırlağanında, em de patlayıcı maddelerni qanunsız satın alğanında, saqlağanında, taşığanında" qabaatlana.
Qırımtatar Resurs Merkezi bu davanı "siyasiy sebepli" dep saya.
Ukrayina tarafı bu malümatnı izaatlamadı.
