İşğal etilgen Qırımda 39 yaşındaki Aqmescit sakini 2022 senesi içtimaiy ağlarda yazğan izaatları içün mahkeme etilecek. Bu aqta yarımadanıñ Rusiye prokuraturası bildire.
Rusiye quvetçileri qadınnıñ derclerinde "millet mensüpligine köre insanlar gruppasına qarşı zorbalıq areketlerini yapma çağıruvlarnı" kördi.
"2022 senesi qabaatlanğan şahıs içtimaiy ağlarda millet mensüpligine köre bir gruppağa qarşı zorbalıq areketlerine çağıruvlarnı derc etken edi", — dep aytıla haberde.
Daa evel Aqmescitte Rusiye quvetçileri yerli sakinni Telegramda "ekstremist faaliyetine" çağıruvlar içün yaqaladı. Bildirilgenine köre, onıñ beyanatında "ruslar" millet mensüpligine köre ayırılğan insanlarğa qarşı zorbalıq areketlerine çağıruvlar bar edi.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler.
